Diwrnod Agored Gorsaf Dân Doc Penfro yn codi £1000 ar gyfer elusen

Ddydd Mercher, 30 Gorffennaf, roedd Gorsaf Dân Doc Penfro yn falch i groesawu aelodau o'r gymuned leol i'w Diwrnod Agored, digwyddiad llwyddiannus a gododd £1,000 i gefnogi Elusen y Diffoddwyr Tân.

Agorwyd y digwyddiad yn swyddogol gan Faer Doc Penfro, y Cynghorydd Michele Wiggins, ac roedd yn gyfle gwych i'r cyhoedd gwrdd â'u criwiau lleol a dysgu mwy am y gwaith hanfodol y mae Gwasanaeth Tân ac Achub Canolbarth a Gorllewin Cymru yn ei gyflawni bob dydd.

Mwynhaodd ymwelwyr amrywiaeth o weithgareddau sy'n addas i'r teulu gan gynnwys "Trochi’r Diffoddwr Tân", paentio wynebau, ac arddangosiadau achub byw. Cymerodd y mynychwyr ran hefyd mewn cyfleoedd dysgu fel ymwybyddiaeth CPR sylfaenol ac addysg diogelwch tân.

Cefnogwyd y digwyddiad gan asiantaethau partner allweddol gan gynnwys Heddlu Dyfed-Powys, Gwasanaeth Ambiwlans Cymru, a Beiciau Gwaed Cymru. Roedd sefydliadau elusennol fel Ambiwlans Awyr Cymru ac Elusen y Diffoddwyr Tân hefyd yn bresennol.

Mae Gwasanaeth Tân ac Achub Canolbarth a Gorllewin Cymru am ddiolch o galon i bawb a oedd yn bresennol ac a gyfrannodd at lwyddiant y diwrnod.